Hai anos que
traballadores e traballadoras de Telemarketing, modernamente denominados call
centers, teñen conxelados uns soldos por baixo do IPC. Pero as diferentes
multinacionais que forman esta patronal, non teñen suficiente, presionan e
chantaxean para rebaixar o convenio existente e precarizar aínda máis as
condicións laborais.
Esa é a tendencia
en todos os sectores, o capitalismo en crise xeral imponnos a sobreexplotación
e volatiliza dereitos no seu intento de evitar a caída tendencial na súa taxa
de ganancia. Traballar por salarios de fame mentres as empresas que cotizan no
IBEX-35 anuncian, sen ruborizarse, millonarios beneficios. A súa recuperación a
costa das condicións de vida e laborais do pobo traballador.
Hai tempo que no
Telemarketing instaláronse os mini jobs, os abusos de medias xornadas, horario
flexíbel, xornadas parciais, contratos por obra e servizo, subcontratacións, remuneración
por incentivos inalcanzábeis, salarios de miseria, falta de descansos durante a
xornada laboral, produtividade, sancións e despedimentos por non vender o
produto... Hoxe as preto de 100.000 persoas que traballan no sector uníronse e
dixeron basta. Unidade sindical para iniciar a loita por un convenio digno,
asembleas de traballadores e traballadoras para ir decidindo a negociación e as
mobilizacións. É un primeiro paso para iniciar un camiño que enfronte o
retroceso que a clase obreira vén sufrindo, como mínimo, desde o ano 2007. A
loita é o camiño, pero hai que ir colocando obxectivos de avance, non só no
convenio, senón máis aló, pois estas multinacionais oligárquicas non cesarán no
intento de, ademais de estafar á clientela, levar aos seus traballadores e
traballadoras a niveis de máxima explotación, ás cadeas se é necesario e lles deixamos.
Calquera vitoria que a clase obreira consiga, o capitalismo oligárquico estará
presto a arrebatárnola se non loitamos, iso xa o aprendemos tras todos estes
anos de retrocesos, pois son eles -a clase parasitaria- ou nós -que todo o producimos-.
Unidade obreira para enfrontar a unhas mega empresas agochadas nunha rede de
subcontratas, que traspasan fronteiras, e solidariedade internacionalista que
evite distinguir segundo o país de orixe. A unidade de clase na loita, a
solidariedade tanto no sector como doutros, vencer o individualismo e o medo son
pezas fundamentais para reverter a tendencia dun sistema que nos necesita
pobres, traballando moitas horas, cobrando moitas menos e pouco e caladiños...
O caso último
máis grave é o da empresa EXTEL- ADECCO Movistar que en plena negociación do
convenio presenta un ERE aos 6000 traballadores e traballadoras que ten en
todos os centros da península, motivos de organización cando Telefónica acaba
de conseguir 1500 millóns de Euros cunha das súas filiais. Débese, e pódese, loitar contra os ERE´s.
O capitalismo
actual, o único posíbel, non ten solución positiva para a clase obreira e
sectores populares, a súa única alternativa para a maioría social é maior
precarización, peores condicións de vida e eliminar todos os dereitos que a
clase obreira foi conquistando ao longo do tempo con duras loitas. Se todo o conquistamos
loitando -pois o patrón nunca regalou nada-, o futuro de traballadores e
traballadoras só poderá vir dunha loita continuada e acumulación de forzas que
nos leve a darlle a volta á tortilla, ata conseguir o poder obreiro e o socialismo.
Desde o Partido Comunista
e os Colectivos da Mocidade Comunista, chamamos ao conxunto do pobo traballador
a apoiar os paros do sector os días 22 e 29 de setembro e a folga estatal do 6
de Outubro, así como a secundar as mobilizacións que o sector en loita suscite.
SOBRAN EXPLOTADORES, NON TRABALLADORES E
TRABALLADORAS
SOLIDARIEDADE COA FOLGA ESTATAL DE TELEMARKETING
TODO PARA A CLASE OBREIRA!