Comunistas da
Galiza-PCPE e os Colectivos da Mocidade Comunista (CMC) mostramos o noso apoio
e solidariedade de clase coa loita dos traballadores e traballadoras de PSA-Citroën
de Vigo, en folga contra os abusos patronais.
Os traballadores e
traballadoras da Citroën van á folga este 15 de xullo en resposta ao incremento
da carga de traballo na liña de produción M-1 e ás consecuencias negativas que
isto xera no cadro de persoal, cun aumento significativo do desgaste nos traballadores
e traballadoras.
A dirección deste
grande monopolio da automoción fai oídos xordos ante as queixas e demandas dos
traballadores. Para eles o importante é aumentar os seus beneficios incrementando
o ritmo de produción sen aumentar a man de obra.
Esta loita vense
a sumar a toda unha serie de conflitos como o de Alcoa, estiba, trasporte e
metal na provincia da Coruña e en Ourense, que abren un novo ciclo de loitas
obreiras centradas na recuperación de dereitos e de ampliación dos mesmos.
Esta vez son os
compañeiros e compañeiras da PSA-Citroën os que se erguen na defensa dos seus
dereitos laborais e fano novamente mediante a folga como Instrumento lexitimo
de loita fronte a aqueles que pretenden converternos nos seus escravos.
Neste período é
fundamental reforzar as organizacións sindicais, convertelas no músculo da
clase obreira, na loita pola recuperación de dereitos e en instrumentos
efectivos contra o réxime de explotación que padecen todos os traballadores e
traballadoras en todas as fábricas, en todos os sectores e centros de traballo.
Para o Partido
Comunista a resposta ás políticas antiobreiras e aos retrocesos laborais destes
últimos anos so poderán ser revertidos mediante a loita organizada da clase
obreira baixo unha orientación unitaria e clasista e non de xestión e de
colaboración con aqueles que amasan os seus beneficios a conta do noso traballo.
É hora de ir a
por eles, clase contra clase, con dignidade, con firmeza e con conciencia de
que a nosa unidade é a única garantía de vitoria.
Á ofensiva!
A polos nosos
dereitos!
