[KKE] “100 anos da Gran Revolución Socialista de Outubro. As ensinanzas e as tarefas para os comunistas hoxe” (Leningrado 2017).
Entre o 11 e 13 de agosto, celebrouse unha
Conferencia Internacional en Leningrado, organizada
polo Partido Comunista Obreiro de Rusia (PCOR) baixo o lema: “100 anos da Gran
Revolución Socialista de Outubro. As ensinanzas e as tarefas para os comunistas
hoxe”.
O Partido Comunista de
Grecia (KKE) foi representado por Giorgos Marinos, membro do BP do CC, e
Eliseos Vagenas, membro do CC e Responsábel da Sección de Relacións
Internacionais do CC de KKE.
A continuación
publicamos o discurso do KKE:
Discurso do KKE na Conferencia
Teórica Internacional de Partidos Comunistas e Obreiros “100 anos da Gran
Revolución Socialista de Outubro, as ensianazas e as tarefas para os comunistas
hoxe”
(Leningrado 11-13/8/2017)
Estimados camaradas:
En nome do Comité
Central do KKE agradecemos o PCOR por esta iniciativa e a celebración da
Conferencia de hoxe.
O Comité Central do KKE
rende honra ao centenario da Gran Revolución Socialista de Outubro. Rende honra
ao acontecemento transcendental do século XX que demostrou que o capitalismo
non é invencíbel, que podemos construír
unha sociedade con organización superior, sen explotación do home polo home.
A Revolución de Outubro
demostrou a forza da loita de clases revolucionaria, a forza dos explotados e
dos oprimidos, cando pasan enerxicamente a primeiro plano e viran a roda da
Historia cara adiante, cara á dirección da liberación social. A clase obreira
rusa a través da Revolución de Outubro materializou o ideal de millóns de
persoas, das masas obreiras e populares por unha vida mellor.
A Revolución de Outubro
demostrou a validez do pensamento leninista de que a vitoria do socialismo é
posíbel nun país ou nun grupo de países, como consecuencia do desenvolvemento
desigual do capitalismo.
Ao mesmo tempo, a
Revolución de Outubro destacou o papel irremprazábel da vangarda política
revolucionaria, do Partido Comunista, como dirixente non só da revolución
socialista, senón ademais de toda a loita pola formación, o fortalecemento, a
vitoria final da nova sociedade comunista.
A contribución de Lenin
e a experiencia dos bolxeviques na loita contra o oportunismo (como vehículo da
ideoloxía e da política burguesa) ten gran e decisiva importancia política e
practica.
Na práctica demostrouse
que a confrontación ben documentada contra os economistas, os menxeviques e os
eseristas foi o elemento principal para a formación das condicións para a
formación do partido revolucionario, do partido de novo tipo, fomentado sobre
os principios leninistas.
O esforzo sistemático
para limpar o partido bolxevique do oportunismo, fortaleceu ás forzas
revolucionarias e (dentro de dous anos a partir do II Congreso en 1903)
permitiu ao partido prepararse e desempeñar un papel decisivo na revolución de
1905 e nos anos da reacción que seguiron, axustando a liña revolucionaria nas
novas condicións.
“O estalido da
insurrección foi reprimido unha vez máis. Exclamaremos entón, Viva a
insurrección!”, escribiu Lenin en setembro de 1905 respecto da insurrección de
Moscova e a continuación, en 1906, destacou que “así, pois, nada podía ser
menos perspicaz que a opinión de Plejánov, que fan súa todos os oportunistas,
de que a folga era inoportuna e non debía terse iniciado, que non se debeu
empuñar as armas”. Pola contra, deberon terse empuñado máis decididamente, con maior enerxía e combatividade; debeuse explicar ás masas que era imposíbel limitarse a unha folga pacífica
e que unha loita armada intrépida e implacábel era necesaria”.
Desde 1905 até a
vitoriosa revolución socialista de outubro de 1917 fíxose clara a diferenza na
calidade, o abismo entre a estratexia da corrente revolucionaria e o
oportunismo dos menxeviques e dos eseristas que fomentaron o fatalismo e
difundiron ilusións parlamentarias, apoiaron o goberno burgués provisional que
se formou en 1917, atraparon os Soviets durante un período crucial e tentaron
neutralizalos.
Os menxeviques e os
eseristas trataron de impedir a revolución de Outubro e levala á derrota,
loitaron contra o novo poder obreiro e socavaron de maneira planificada a
construción socialista e estas forzas oportunistas nos anos seguintes corroeron
o PCUS e xogaron un papel primordial na contrarrevolución e na restauración do
capitalismo na Unión Soviética.
Hoxe en día, cando as
consecuencias da contrarrevolución atacan á clase obreira en todo o mundo de
maneira dura e xa se demostrou na práctica que o capitalismo dá lugar a guerras
imperialistas, a crises económicas, ao desemprego, á pobreza e aos refuxiados,
forzas oportunistas falan descaradamente para a revolución de Outubro e, en
todo caso, tratan de socavar, de eliminar o carácter socialista da revolución de
Outubro e a súa enorme contribución histórica.
De feito, as forzas
oportunistas levaron a cabo unha campaña antisoviética, anticomunista,
organizada durante todo o curso da construción socialista, baixo o manto do
eurocomunismo ou das súas variantes en moitos países.
As e os comunistas deben
lembralo e aprender diso.
O oportunismo cambia de
nome e de formas de organización e de expresión, pero en cada momento segue
sendo un gran perigo para o movemento comunista, un factor de corrosión e de
asimilación no sistema de explotación capitalista.
Camaradas:
A chama da Revolución de
Outubro conduciu e acelerou a creación de varios Partidos Comunistas, de
partidos obreiros revolucionarios de novo tipo, en contraste cos partidos
socialdemócratas daquela época que traizoaran á clase obreira e a política
revolucionaria.
Durante décadas, a
existencia e os logros da sociedade socialista, que foi inaugurada pola
Revolución de Outubro, demostraron que é posíbel unha sociedade sen patróns,
sen capitalistas que posúen os medios de produción. Esta conclusión non se pode
refutar polo feito de que naquel período particular non logrou derrotar
definitivamente a propiedade capitalista e a ganancia capitalista.
A necesidade e a
vixencia do socialismo, a posibilidade de abolir a propiedade privada nos
medios concentrados de produción derivan do desenvolvemento capitalista que
conduce á concentración da produción. A propiedade capitalista é un freo para o
carácter social da produción. A propiedade capitalista cancela a posibilidade
de que todos os traballadores vivan en mellores condicións organizadas a nivel
social que satisfagan as necesidades crecentes humanas: Que todos teñan
traballo sen o pesadelo do desemprego, que traballen menos horas gozando unha
calidade de vida mellor e servizos de educación, de sanidade e de benestar de
alto nivel, exclusivamente públicos e gratuítos.
No capitalismo, a clase
obreira crea estas oportunidades co seu traballo que se amplían co
desenvolvemento das ciencias e da tecnoloxía. Con todo, nunha sociedade onde
todo o que se produce e o modo de produción determínanse sobre a base da
ganancia privada, capitalista, as necesidades da clase obreira e das capas
populares están suprimidas. A esencia do problema radica no feito de que uns
producen mentres que outros deciden os obxectivos e a organización da
produción. As crises económicas cíclicas están no ADN do capitalismo e fanse
máis profundas e sincronizadas; consecuentemente auméntase bruscamente o
desemprego, expándese de novo o traballo mal pago e sen seguridade social, a
vida con dereitos esmagados, con guerras imperialistas para a repartición dos
mercados e dos territorios.
A pesar do aumento da
produtividade do traballo, as condicións de traballo e de vida deterióranse en
todo o mundo capitalista, mesmo nos Estados capitalistas máis desenvolvidos. Os
propios Estados capitalistas, os seus centros de investigacións, afirman que se
reducen os ingresos dos traballadores, mentres que se aumentan as ganancias dos
capitalistas.
O feito de que se
crearon as condicións previas para a construción da sociedade
socialista-comunista non significa que isto sucederá automaticamente. Unha
razón importante é o feito de que, a diferenza das leis da natureza, o
desenvolvemento social require a actividade humana, neste caso a loita de
clases para a abolición da vella sociedade e a construción da nova sociedade.
O estalido da revolución
socialista (así como de todas as revolucións sociais na Historia da humanidade)
implica unha situación na cal se debilita a capacidade da clase dominante de
asimilar, suprimir e aplacar ao pobo.
Lenin formulou o
concepto da situación revolucionaria e identificou as características
principais obxectivas e subxectivas da sociedade na véspera da revolución. Con
todo, como sinalou Lenin acertadamente, non toda situación revolucionaria
desemboca nunha revolución. Nin a reacción dos de "abaixo" nin a
crise nos de "arriba" provocarán un derrocamento, a menos que exista
un levantamento revolucionario planificado da clase obreira, dirixido pola súa
vangarda consciente.
Dito doutro xeito, para
que estale a revolución obreira requírese a presenza da vangarda política
revolucionaria, do Partido Comunista, armado con elaboracións teóricas e coa
predición dos acontecementos baseada na cosmovisión marxista-leninista, capaz
de dirixir o levantamento revolucionario da clase obreira.
Desgraciadamente, a
experiencia positiva da Revolución de Outubro non foi asimilada e non
prevaleceu ao longo de toda a existencia da Internacional Comunista. En cambio,
a través dun curso contraditorio, prevaleceu en gran medida o concepto
estratéxico que, en xeral, expuña como obxectivo un poder ou un goberno de tipo
intermedio entre o poder burgués e obreiro, como poder transitorio cara ao
poder socialista.
Hoxe día podemos ver
mellor que o esforzo complexo da política de asuntos exteriores da URSS para
atrasar o máis posíbel o ataque imperialista e utilizar as contradicións entre
os centros imperialistas nesta dirección, está relacionada con importantes
alteracións e cambios na liña da Internacional Comunista que desempeñaron un
papel negativo no curso do movemento comunista internacional nas décadas
seguintes. As alteracións tiñan que ver coa confrontación da corrente fascista,
a actitude respecto da socialdemocracia, así como á propia democracia burguesa.
Xurdiu entón a distinción política das alianzas imperialistas daquel período en
agresivas, nas que se clasificaban as forzas fascistas e nas alianzas
defensivas nas que se clasificaban as forzas democrático-burguesas.
En particular, a
avaliación respecto da existencia dunha á esquerda e unha á dereita nos
partidos socialdemócratas na década de 1930, da que xurdía a alianza con estas
forzas, estaba equivocada, o cal menosprezaba a súa transformación completa en
partidos da burguesía. Esta distinción equivocada foi mantida mesmo despois da
II Guerra Mundial.
Estes cambios,
obxectivamente, atrapaban a loita do movemento obreiro baixo a bandeira da
democracia burguesa. Respectivamente, a distinción dos centros imperialistas
entre os a favor da paz e os a favor da guerra, escondía o verdadeiro culpábel
pola guerra imperialista e o ascenso do fascismo, o capitalismo monopolista. É
dicir, non sinalaba a tarefa estratéxica imperativa dos Partidos Comunistas de
combinar a concentración de forzas pola loita pola liberación nacional ou pola
loita antifascista, coa loita polo derrocamento do poder burgués, utilizando as
condicións da situación revolucionaria, que se formaron en varios países.
En xeral, a
Internacional Comunista nas súas elaboracións estratéxicas subestimou o
carácter da época e predominou a definición do carácter da revolución tendo
como criterio a posición dun país capitalista no sistema imperialista
internacional. É dicir, adoptáronse erroneamente como criterios para a definición
do carácter da revolución o nivel mínimo de desenvolvemento das forzas
produtivas dun país, en relación co nivel superior alcanzado por poténcialas
líderes no sistema imperialista internacional, así como a correlación de forzas
negativa a expensas do movemento obreiro revolucionario.
Con todo, o
desenvolvemento desigual das economías capitalistas e as relacións desiguais
entre os Estados non se poden abolir no marco do capitalismo. En última
instancia, o carácter da revolución nos países capitalistas determínase
obxectivamente pola contradición básica que debe resolver, independentemente
dos cambios relativos na posición de cada país no sistema imperialista. O
carácter socialista e as tarefas da revolución xorden da agudización da
contradición básica entre o capital e o traballo nos países capitalistas na
época do capitalismo monopolista.
En varias elaboracións
de Partidos Comunistas, o enfoque do obxectivo do poder obreiro baseábase no
criterio da correlación de forzas e non na definición obxectiva da época
histórica en que vivimos en base á clase cuxo movemento está na vangarda do
desenvolvemento dos acontecementos sociais, é dicir da actividade pola
liberación social.
Con todo, estes erros na
estratexia do movemento comunista internacional así como os erros cometidos
polo PCUS na elaboración da súa política interna, xunto co esperado labor do
imperialismo e da contrarrevolución para socavalo, afectaron os acontecementos
a continuación.
A Revolución de Outubro
puxo de manifesto unha organización superior da sociedade, que foi radicalmente
diferente de todos os sistemas que precederon historicamente e cuxo trazo común
era a explotación do home polo home.
Naquel período
desenvolvéronse as novas institucións de participación obreira, cuxo núcleo
inicialmente era o centro de traballo, unha relación política que foi
posteriormente violada, retrocedendo ante as dificultades obxectivas existentes
así como ante presións subxectivas. Baixo a presión de preparación para a
contribución activa de todo o pobo ante a guerra inminente, a Constitución
Soviética de 1936 xeneralizou o dereito a voto mediante unha votación secreta
universal en base ao lugar de residencia. As asembleas de delegados en cada
unidade de produción como núcleos de organización do poder obreiro foron
degradadas. Na práctica, aumentouse a dificultade de revogación de delegados
dos órganos estatais superiores.
Interpretáronse como
debilidades inevitábeis da planificación central e non como resultado das
contradicións da supervivencia do antigo, como resultado dos erros dun plan que
non fora cientificamente elaborado. Así que no canto de buscar unha solución á
expansión e o fortalecemento das relacións comunistas de produción e de
distribución, buscouse mirando cara ao pasado á utilización de ferramentas e de
relacións de produción do capitalismo. A solución buscouse na expansión do
mercado, no "socialismo de mercado".
Como punto de viraxe
destácase o XX Congreso do PCUS (1956), porque entón, utilizando como vehículo
o chamado "culto á personalidade", adoptouse unha serie de posicións
oportunistas sobre cuestións da estratexia do movemento comunista, das
relacións internacionais, e, en parte, da economía. En xeral, debilitouse a
administración central da planificación. No canto de planificar a transformación
dos koljoses en sovjoses e sobre todo de iniciar o paso de toda a produción
cooperativa-koljosiana baixo control estatal, en 1958 os tractores e outras
máquinas pasaron a ser propiedade dos koljoses, unha posición que fora
rexeitada no pasado.
Poucos anos máis tarde,
a partir da chamada “reforma Kosyguin” (1965), adoptouse a categoría burguesa
do “beneficio empresarial” de cada unidade de produción individual e a
vinculación deste cos soldos dos administradores e dos traballadores. A
avaliación da produtividade das unidades de produción socialistas tendo como
criterio o volume da produción foi substituída pola avaliación do valor do seu
produto. O proceso de acumulación de cada unidade socialista foi desconectado
da planificación central o cal tivo como consecuencia o enfraquecemento do
carácter social dos medios de produción e da reserva de produtos. Ao mesmo
tempo, até o 1975, todas as granxas estatais, os sovjoses, pasaran ao réxime de
auto-xestión completa. Todas estas medidas levaron á creación das condicións
previas para a apropiación e propiedade privada, unhas relacións que estaban
prohibidas pola lei.
Aproximadamente no mesmo
período foi revisada ademais a percepción marxista-leninista sobre o Estado
obreiro. O 22º Congreso do PCUS (1961) describiu o Estado da URSS como Estado
“de todo o pobo” e o PCUS como un “partido de todo o pobo”. Estas posicións
conduciron a un rápido enfraquecemento e, a continuación, á mutación das
características revolucionarias e da composición social do Partido. A
dexeneración oportunista do PCUS transformouse nunha forza abertamente
contrarrevolucionaria que se manifestou en 1987, mediante a aprobación da lei
que consolidaba institucionalmente as relacións capitalistas baixo o pretexto
da variedade de relacións de propiedade, da notoria política de
"perestroika" e de "glasnost". Este evento sinala o comezo
formal do período da contrarrevolución.
Estimados camaradas:
O KKE pretende sacar
conclusións necesarias para o presente tanto das vitorias como das derrotas
amargas e a retirada do movemento comunista. A través dun gran esforzo
colectivo duro o KKE desenvolveu unha estratexia revolucionaria contemporánea
que mellora a súa capacidade de organizar focos de resistencia e de
contraataque avanzados en cada sector da economía, en cada rexión do país.
O fortalecemento do KKE
en todos os niveis, un tema que foi discutido no recente 20º Congreso do
Partido, é unha condición previa para a promoción da súa política
revolucionaria.
Ao mesmo tempo, o KKE
loita polo reagrupamento do movemento comunista internacional, de acordo cos
principios do internacionalismo proletario e a solidariedade internacionalista
dos pobos contra o capitalismo e a guerra imperialista que se expresan a través
de consigna "Proletarios de todos os países, unídevos". Xa se deron
algúns pequenos pasos no esforzo de crear un polo distintivo en base aos
principios do marxismo-leninismo, a través da "Revista Comunista
Internacional" e a Iniciativa Comunista Europea.
Un compoñente da
estratexia contemporánea do KKE é a súa percepción programática do socialismo. A construción socialista empeza coa conquista revolucionaria do poder pola
clase obreira. O Estado obreiro, a ditadura do proletariado, é o instrumento da
clase obreira na loita de clases que continúa no socialismo con outras formas e
medios. Utilízase para o desenvolvemento planificado das novas relacións
sociais, o cal ten como condición previa a frustración dos intentos
contrarrevolucionarios, así como o desenvolvemento da conciencia comunista da
clase obreira. O Estado obreiro, como mecanismo de dominación política, é
necesario ata que todas as relacións sociais se convertan en comunistas, ata
que se desenvolva a conciencia comunista na inmensa maioría dos traballadores,
así como ata que se consiga a vitoria da revolución, polo menos nos países
capitalistas máis poderosos.
Estimados camaradas:
Hai 100 anos, nesta
cidade, o VI Congreso do partido bolxevique tomou a decisión que significou un
fito, que trazou a liña da insurrección armada. A implementación da decisión
conduciu dentro de poucos meses a que soaron os canóns de “Aurora”. Hoxe, 100
anos despois, os comunistas en todo o mundo están chamados a profundar nesta
traxectoria histórica, a sacar conclusións valiosas, a trazar a estratexia revolucionaria
contemporánea nos seus países e a nivel internacional.
Esta é a resposta
necesaria para a confrontación do traballo corrosivo do oportunismo, para a
superación do repregamento ideolóxico, político e organizativo do movemento comunista,
o seu reagrupamento revolucionario.
O axuste da estratexia
dos partidos comunistas para corresponder co carácter da nosa época, a época de
transición do capitalismo monopolista-imperialismo, ao socialismo, que foi
inaugurado pola Revolución Socialista de Outubro e, conseguintemente, a
superación das etapas de transición que existían nos programas dos partidos
comunistas e a definición do carácter da revolución como socialista, é
obxectivamente necesaria e exixíbel.
Esta dirección pode
contribuír significativamente á liberación de opcións políticas que operan no
marco da xestión do capitalismo, como son os chamados “gobernos de esquerda” e
a alianza coa socialdemocracia, dar un impulso á loita antimonopolista-anticapitalista,
a elaboracións que se basean nas esixencias da loita de clases e poden
contribuír significativamente na preparación do factor subxectivo, na
concentración de forzas obreiras e populares na loita polo derrocamento do
capitalismo e a construción do socialismo-comunismo.
Fonte: KKE
Traducido ao galego pola Revista FORXA.