O PCPE participou na Conferencia Internacional do 100
aniversario da Revolución de Outubro, celebrada en Leningrado (actualmente, San
Petersburgo) entre os días 10 e 14 de agosto.
A conferencia foi organizada polo noso partido irmán PCOR
(Partido Comunista Obreiro Ruso), pertencente ao equipo editorial da Revista
Comunista Internacional. Asistiron 28 delegacións, incluíndo ao Partido
Comunista de Grecia (KKE), o Partido Comunista (Italia), o Partido Socialista
de Letonia, o Partido Comunista de Polonia, o Partido Comunista de Siria ou a
Unión dos Comunistas de Ucraína, entre outros.
A delegación do PCPE, estivo a cargo do camarada Juan
Nogueira, antigo Secretario Xeral dos CJC e actualmente membro da Área Internacional
do Partido.
Ademais, 15 organizacións que non puideron estar
presentes enviaron un saúdo á Conferencia e interesáronse por asinar a
declaración final. Entre outros o Partido Comunista Brasileiro, o Partido
Obreiro de Hungría, o Partido Comunista de México ou o Partido Comunista de
Venezuela.
Durante a Conferencia analizáronse autocriticamente
algunhas das causas que conduciron ao triunfo contrarrevolucionario na URSS e á
restauración do capitalismo. O estudo das leccións de Outubro permite coñecer e
evitar os erros cometidos na construción do socialismo, así como aplicar os
seus principios universais ás condicións concretas de cada proceso
revolucionario.
Nese sentido, a intervención do PCPE avaliou negativamente
o papel de quen esaxera a particularidade das condicións nacionais para evitar
aplicar os principios marxistas-leninistas universais á súa realidade, ou quen
se escuda na conxuntura ou a correlación de forzas para evitar expor unha
estratexia revolucionaria. Igualmente insistiuse na concepción do imperialismo
como a fase superior e última do desenvolvemento do capitalismo, e non unicamente
unha política exterior agresiva, polo que supón un erro vestir de “vermello” a
actuación de bloques ou polos imperialistas non occidentais.
Oficina de prensa do PCPE
Fonte: Novo Rumbo nº3