Como é seu costume,
a clase no poder e os seus representantes políticos e mediáticos continuarán a
tratar esta traxedia que vivimos a diario como se dun feito illado se tratase e
non dun problema social que afecta sinaladamente ás mulleres da nosa clase
traballadora e que ten causas enraizadas no máis fondo do sistema de
explotación clasista no que nos achamos inmersas.
Neste mes de
Novembro celébrase tamén o Centenario da Gran Revolución Socialista de Outubro
e corresponde máis que nunca lembrar o papel xogado nela polas mulleres e o que
supuxeron as conquistas de Outubro para a muller soviética e para as mulleres
obreiras de todo o mundo.
Antes da
Revolución, na Rusia semifeudal a muller carecía de dereitos , encadeada ao
matrimonio, escrava do pai e do marido e afastada da vida social e da
propiedade sobre os bens.
O seu acceso á
produción, aínda que provisional e substitutorio -na coxuntura da primeira gran
guerra imperialista-, trouxo consigo a incorporación da muller traballadora á
loita social e política.
De feito a
incorporación de milleiros de mulleres á loita revolucionaria foi un factor
fundamental do trunfo da Revolución.
Ao xove Estado Obreiro
corresponde a lexislación pioneira sobre dereito a sufraxio e participación en
pé de igualdade da muller na vida laboral, social e política. O dereito ao
divorcio, a despenalización do aborto gratuíto nos hospitais do Estado, a
licenza maternal remunerada, a abolición da prostitución, a eliminación da
distinción entre fillos lexítimos e ilexítimos... foron conquistas pioneiras do
Socialismo que abriron camiño ás reivindicacións de millóns de mulleres no
mundo enteiro.
A transformación
do traballo doméstico en traballo social a través dunha rede de garderías,
comedores, casas de maternidade, lavanderías populares, e a posta da técnica ao
servizo da mecanización dos máis duros traballos no campo e na industria,
durante os Plans Quinquenais, foi a base material que fixo posíbel a
emancipación das mulleres das tarefas tradicionalmente asignadas a elas no
vello réxime. A súa alfabetización en masa e incorporación á produción, aos
estudos superiores e á xestión e dirección da produción.
A Revolución
Socialista sentou as bases materiais e técnicas para a emancipación efectiva da
muller.
Outubro amosou que só cando a propiedade sobre os medios de produción muda de amos e xa que logo a economía planificada baixo control das obreiras e os obreiros se coloca ao servizo da maioría da sociedade e da satisfacción das necesidades sociais, comeza a ser un feito a posibilidade de conquistar a igualdade para millóns de mulleres liberadas do sistema de explotación que as utiliza como escravas domésticas e exército de reserva.
Outubro amosa que
a participación das mulleres traballadoras, en unidade con toda a súa clase, na
loita organizada obreira e revolucionaria, é a única garantía da vitoria.
Comunistas da Galiza-PCPE
[Novembro 2017]